长远呒么修理过的记性

是一部拆刮里新的有轨电车

从脑门后头追牢自家奔

交关年数了，始终逃勿脱

老里八早的事体侪部回到眼门前

但是，想想几年前头轧朋友

又像似十九世纪的欧洲浪漫小说

又冷又慢，温吞水一样

从自家的眼乌子里偷偷落下来

一滴滴都留勿牢

当初辰光，呒么妖形怪状的打扮

男小囡憨头憨脑，穷得像只赤佬

照样一天到夜神抖抖，感觉良好

小姑娘文文静静对时髦货勿懂经

看啥讲啥，勿是三毛，就是琼瑶

荡起马路，伊拉勿敢掺牢手

最多豁豁翎子、抛抛眯眼

沿牢上街沿的贴脚线，边走边讲

两家头当中空开十公分

像似爱情禁飞区容勿得非分之想

民主墙荒废了，柏林墙拆光了

外滩情人墙是第三块倒塌的墙

小青年勒陌生头变得走投无路

只好乖乖叫摸出铜钿来掼浪头

跑进乌漆墨黑的咖啡馆里劈情操

穷瘪三吭子吭子赚钞票

小开豁豁谈吐就花牢

拆白党、仙人跳的故事天天翻花样

搞五搞六的事体统统寻牢柏万青

托托王伯伯，到头来统统烦不清

姆妈再勿偷听同学打来的电话

呒么学堂老师拎勿清来捉早恋

但是，为啥体阿拉反而呒介事

男人挑了卖相勿过念头还要留备胎

女人拣好房子拣车子只为终身饭票

等到最后，阿拉好勿容易眯花眼笑

用大红喜字敲定了一份商业合同

一只脚跨进了甜到齁死的归宿——

一张张花花绿绿的提篮桥

一座座睏得笔笔挺的西宝兴路

2012年5月6日