赤佬十四行

赤佬拿外滩吃下去了伊讲。先咪一口

黄浦江，再吞一粒东方明珠伊讲。

中国银行忒硬，嚼勿动伊讲。赤佬

霓虹灯当葡萄酒吃醉忒了伊讲。

额骨头挺括，徐家汇胖笃笃像罗宋面包伐？

赤佬勿欢喜甜味道，情愿去舔

像块臭豆腐个城隍庙伊讲。

花露水浓，淮海路湿嗒嗒像奶油浓汤伐？

赤佬吃勿惯西餐，情愿去咬

像盘红烧烤麸个静安寺伊讲。赤佬

大世界吃了忒涨，吐得来一天世界伊讲。

哎，赤佬戆有戆福，屁股野歪歪，

馋唾水汤汤点，吃相覅忒难看，

拿钞票当老垦搓出来含了嘴巴里伊讲。

夜上海

掼忒。

      眼泪水捧了加牢，统统掼忒

一塌刮子呒没几朵夜来香，别了领头上

       拨老虫撷得去，送拨隔壁头咯咯鸡

娘舅老早困着了。

                 呆忒。格末

钢琴奔过襄阳路，也听勿到了。

                             闷忒。

夜快头，一只羽毛球飞到云里，从印度洋

绕过去，

       停忒。星星又勿晓得

要唱到啥人耳朵里去。教法国梧桐

也只会得乌里麻里吹吹东南风。

                          戆忒。

小屄样子还以为世界是伊个。

昏忒。

      捏好裤裆当心人家捉扳头

野野胡要拨生活吃生活个，乃末

瘪忒。

     夜里黑绰绰，像一只敲瘪橄榄

轧好闹猛，啃了清清爽爽，

                      掇忒。